Innkjøpsordning - ny norsk sakprosa for vaksne

Føremålet med innkjøpsordninga for ny norsk sakprosa er at det blir skrive, gjeve ut, spreidd og lese ny norsk sakprosa av høg kvalitet. Ordninga skal bidra til en open og opplyst offentleg samtale.

Innkjøpsordninga garanterer forlaga eit minstesal på 773 eksemplar av bøker (623 trykte bøker og 150 e-bøker, men for titlar som er påmelde og innkjøpte før runde 1-2022, skal det framleis leverast 703 trykte bøker og 70 e-bøker). Ordninga er selektiv, det vil seie at det er budsjettet som avgjer kor mange sakprosabøker som kan kjøpast inn årleg. Dei innkjøpte bøkene blir distribuerte til alle folkebiblioteka i landet.

Alle norske forlag/utgjevarar kan søkje om innkjøp av bøker som kjem inn under ordninga. Dette inkluderer bøker omsett frå samisk til norsk av forfattarar busett i Noreg, men det første originalverket på samisk kan ikkje vere meir enn tre år gammalt på søknadstidspunktet.

Ordninga gjeld ny norsk sakprosa for vaksne, skriven i ei essayistisk, forteljande, resonnerande, opplysande eller argumenterande form, av ein eller fleire forfattarar og for eit breitt publikum. Ordninga er regulert av retningsliner som søkjarane må setje seg inn i.